تیری دوستی دی قسم چا کے آھداں
کدی فرق پاواں تاں اللہ ناں بخشے
تیرے نال ھے زندگی بھر دا وعدہ
نہ وعدہ نبھاواں تاں اللہ نہ بخشے
میں ثابت قدم آں تے راھساں ہمیشہ
کدی ڈگمگاواں تاں اللہ نہ بخشے
توں بھار اپنڑی مرضی دے بےشک چوائی آ
تھکیڑا جنڑاوں تاں اللہ ناں بخشے
محبت دے وچ وی ہے توحید لازم
کیدائیں ھور جاواں تاں اللہ نہ بخشے
جدوں تائیں قائم اے ساھاں دا تسلسل
کوئی نام چاواں تاں اللہ نہ بخشے
جے دانستہ دیواں شکايت دا موقعہ
تیرا دل دُکھاواں تاں اللہ نہ بخشے
سمجھ کے تیرا ثانی ساری خدائی تے
کئیں نوں بولاواں تاں اللہ نہ بخشے
میرا درد پوھرا تے منتاں دا حاصل
میری سُنجی سوچاں دا عنوان توں اے
تیرے چندر مُکھ دے مقدر سپارے توں
نظراں ھٹاواں تاں اللہ نہ بخشے
No comments:
Post a Comment